Dear Royalty,
Gbas gbos, gbas gbos, no fit solve matter every time o!
We don talk about family matter before. But e get another one wey I don dey reason since I be pikin.
Na this mother-in-law, father-in-law, daughter-in-law, sister-in-law matter.
E get one question wey I wan ask o: why be say, you never even enter relationship, you don already make up your mind say, if this person do like this, me sef go do like that? No vex o, I understand say some people matter get as e be, but that one no be the koko of the matter now. YOU, you don already prepare for war, na my concern be that.
Okay, reason am, if you don prepare for war, you don prepare for peace too?
The thing dey always shock me. You never see woman to marry or man to marry you, first date, you go open mouth talk say, if your papa try this, if your mama try am, I no go take am. Eii? Naso!
No misunderstand me o. Like our previous post, I know say once in a while, we go get some one or two mishaps. I mean, all of us be human, so we no go always see eye to eye. But, howfar? Shey you no go make up your mind say, okay o, if person vex me, I no go gree vex back?
Romans 12:18 talk say, “If it be possible, as much as lies in you, live peaceably with all men.” This one difficult o, make I no lie, me sef wey dey type this, na only GOD dey help me.
It’s important say, aside from going into relationships just to get peace with your spouse, make you also strive to get peace with your in-laws. They go be your family too.
Make I give you small example. My friend Kemi don marry for five years now. When she just start, she no too dey gel with her mother-in-law. Kemi don prepare for wahala, but one day she decide say she go try another approach. She start to dey show her mother-in-law love and patience. Now, dem be like best friends. Anothe example, Peter, Him no too like him wife’s sister at first. He always dey prepare for quarrel as the girl sef get serious wahala. But one day, him decide to just dey calm and try to understand her. Today, dem dey relate well well.
Ephesians 4:2-3 talk say, “With all lowliness and meekness, with longsuffering, forbearing one another in love; Endeavouring to keep the unity of the Spirit in the bond of peace.”
Conclusion be say, if you fit prepare for war, you fit also prepare for peace. No dey carry old mindset enter new relationship. Open your heart, and try to dey understanding. Peace with your in-laws fit make your marriage even sweeter. Remember, dem go be your family too.
The peace, na you go enjoy am pass, no be only your spouse. When you no dey fight with people, your heart go just dey like butter and sugar mix together, e go dey sweeet. But if everytime, na so so fight, temper, shout sotey, na high blood pressure o. Reason am?
Remember, Hebrews 12:14 talk say, “Follow peace with all men, and holiness, without which no man shall see the Lord.”
With love and Hope,
Sharon Paulina Boye
August 17, 2024
Leave a Reply